LOUS YAQUÉS À NABARRÉNCS

LOUS YAQUÉS À NABARRÉNCS

À l'àdyẹ mieyancè, lou cùltẹ de las reliques dous Sénts qu'éy au méy haut. Au sèclẹ nabau, la descoubèrte de la hosse de Sént Yàquẹs que hè de Coumpoustèle lou tresau gran loc de pelerinàdyẹ de la crestiantat, darrè Jerusalèm e Roume. La glèyse bastide per Alfounse II, réy de las Asturies, qu'atire dap lous soûs miràclẹs, lous permès pelerîs espagnòus e pourtugués. Au miéy dou sèclẹ dedzau, l'abèsquẹ dou Puy en Velay, Godescalc, que-s rén ta Coumpoustèle e qu’aubréch la bie aus pelerîs estranyès de France e de Nabarre.

La Nabarre qu'éy û petit reyàumẹ qui coubréch la mieytat dou departamén de la Pirenées-Atlantiques dinqu'à Pamplune au nord de l'Espagne. Qu'éy û passàdyẹ oubligat dou camî de Yaqués, bie de coumunicacioû e de càmbi de culture cap au Soumport e Rouncesbaus.

 

Au sèclẹ ounzau lous prougrès de la Recounquiste qu'òrbẹn lou caminau aus païs de l'Europe e que hen basti hères d’obres de religioû e de coumèrcẹ. Au sèclẹ doudzau, lous biscoùntẹs de Biarn qu'apiten û castèth, aperat la casterasse, enta proutedya lous bés e las yéns de Nabarréncs (ço qui bòu dìsẹ «  termière de Nabarre »). Que yéten û poun sus lou Gàbẹ d'Aulouroû e que bastéchẹn ûe capère e û espitau (pourtan lou noum de Sént Antòni) enta recébẹ lous Yaqués. Héns aquéth oustau que laben lous pès dous pelerîs qui soun neurits, loudyats e soegnats si hè besougn.

 

Au sèclẹ tredzau lou poun de huste qu'éy cambiat per û de pèyre, méy aysit tau passàdyẹ dou bestia e dou moùndẹ qui ban tau marcat dus dimèrs per més. Au sèclẹ quatourzau la ciutat que debién ûe bastide dap lou For de Mourlaas enta proutedya lous abitans e lous  pelerîs qui ne pagan pas en traucan lou poun. Lou recensamén de Gastoû Febus, en 1385, que ménte l'espitau Sént Antòni en permè rénc dous 85 hoécs de Nabarréncs.

 

Au sèclẹ sedzau, la bastide destruide per lous Espagnòus qu'éy rebastide en place horte per lou réy de Nabarre, Enric II de Labrit, qui hè d’aquéste la permère ciutat bastiounade de France, en 1547. Més, enta quilha lous rampars, que hèn càdẹ lous bastiméns Sént Antòni, alabets la casterasse qui hasè l'arcoélh dous pelerîs. La nabère glèyse Sént Germâ que sera inaugurade en 1563 per Yane de Labrit, la may dou Noùstẹ Enric, qui chausira lou cùltẹ proutestan.

Las guèrres de religioû, e méy tart la reboulucioû, que ban traba lou pelerinàdyẹ, més lous Papes que-u tourneran abourri pendén lous sèclẹs ad darroun.  En 1998, lou camî de Sént Yàquẹs qu'éy classat per l'UNESCO au « Patrimòni de l'umanitat ».

Au die de oéy, Nabarréncs que mèrque lou bint-e-cinquième estanguét dou sendè de grane passeyade (G.R.65) dou Puy en Velay enla : lous Yaqués que-s y repausen ûe noéyt e que besiten la ciutat.

Tout sé, dou més d'abriu dinqu'à marterou,la parropie que-us amasse hens la glèyse enta prega e puch héns ûe sale d’arcoélh ta bébẹ à l'amistat

 Aquéth moumén d’escàmbi qu'orbéch lou co dous abitans e dous pelerîs qui trauquen lou camî de Coumpoustèle, escribut héns ûe istòri de mil ans e méy

Yan de Lopez